डॉ. बाबासाहेब आंबेडकर सामाजिक न्याय भवन, शासकीय औद्योगिक प्रशिक्षण संस्थेसमोर, श्रद्धानंदपेठ, नागपूर-440022
महाराष्ट्र शासनाच्या सामाजिक न्याय व विशेष सहाय्य विभागांतर्गत अनुसूचित जाती, नवबौद्ध, विमुक्त जाती, भटक्या जमाती, इतर मागास प्रवर्ग, तसेच महिला, दिव्यांग, जेष्ठ नागरिक आणि तृतीयपंथीय व्यक्तींसाठी विविध कल्याणकारी योजना राबवल्या जातात. या योजनांचा उद्देश शैक्षणिक, सामाजिक आणि आर्थिक जीवनमान उंचावणे तसेच सर्वांगीण विकास साधणे हा आहे. समाजातील वंचित आणि शोषित घटकांना मुख्य प्रवाहात आणण्यासाठी विभाग कटिबद्ध असून, विद्यार्थ्यांसाठी शैक्षणिक मदत योजना, वसतिगृहे, शिष्यवृत्ती योजना यांसारख्या विविध उपक्रमांद्वारे शैक्षणिक प्रगतीला चालना दिली जाते. महिलांसाठी स्वयंरोजगार व आर्थिक मदत योजना, दिव्यांग आणि ज्येष्ठ नागरिकांसाठी विशेष अनुदान तसेच तृतीयपंथीय समुदायाच्या सक्षमीकरणासाठी विशेष योजना आखल्या जातात. गरजू व्यक्तींच्या न्यायहक्कासाठी आणि सामाजिक सन्मानासाठी विभाग विविध उपक्रमांचे प्रभावीपणे कार्यान्वयन करत आहे. या सर्व योजनांचा लाभ गरजूंपर्यंत पोहोचविण्यासाठी समाज कल्याण विभागातील अधिकारी आणि कर्मचारी सदैव तत्पर असून, सामाजिक न्याय विभाग केवळ योजनांची अंमलबजावणीच करत नाही, तर गरजूंच्या आयुष्यात सकारात्मक बदल घडविण्यासाठी समर्पित आहे.
आपले सहकार्य आणि सहभाग आमच्यासाठी प्रेरणादायी आहे. चला, सामाजिक न्यायाच्या दिशेने एक पाऊल पुढे टाकूया!
मागासवर्गीय मुला-मुलींची शिक्षणाची सोय व्हावी, त्यांना उच्च शिक्षण घेता यावे त्याचप्रमाणे आर्थिक दृष्ट्या दुर्बल घटकांसाठी मुलींना विद्यालय व महाविद्यालयीन शिक्षण घेता यावे यासाठी शासकीय वसतिगृहे विभागामार्फत चालवले जातात.
शासकीय वसतिगृहात प्रवेश घेण्यास पात्र असलेल्या परंतु प्रवेश न मिळालेल्या, शासकीय वसतिगृहात प्रवेश न घेतलेल्या विद्यार्थ्यांना सर्व सोयी सुविधा स्वतः उपलब्ध करुन घेण्यासाठी रक्कम त्यांच्या आधार संलग्न बँक खात्यावर थेट जमा करण्यात येते.
अनुसूचित जातीच्या व नवबौद्ध मुला-मुलींना आर्थिक परिस्थितीमुळे प्राथमिक व माध्यमिक शिक्षण घेता येत नाही अशा मुला मुलींच्या शिक्षणाची सोय व्हावी म्हणून प्रत्येक तालुक्यात एक शासकीय निवासी शाळा विभागामार्फत चालविली जाते.
